Zer da ZAZPI proiektua?

ZAZPI proiektuaren helburua da nire historia kontatzea: esklerosi anizkoitzaren diagnostikoa, hasierako kolpea, egoerari buelta ematen hastea, nire inguruaren papera, kirola, …

Horretarako, kamera aurrean jarri eta hizketan aritu ordez, bidaia bat egingo dut.

ZAZPI proiektuak hiru fase izango ditu:

1. Kontakizuna
2. Bidaia
3. Dokumentala

Kontakizuna

Kontakizunarekin hasi nintzen aurrena. Blogean irakurri dezakezu nola joan naizen kontatzen zer den esklerosi anizkoitza, nola antzeman nuen lehen aldiz gaitza, ospitalera egin nuen bisita, zulo sakon batean egon nintzenekoa, …

Mila aurpegidun gaitza esaten diote esklerosi anizkoitzari eta nik gaixotasunarekin izan dudan nire historia kontatzen dut. Nik bizi eta sentitu dudana.

Kontakizuna kapituluka antolatu dut, samurragoa izan dadin gai bakoitzari buruz hitz egitea.

Bidaia

Euskal Herriko probintzia bakoitzeko mendi-tontorrik garaiena lotzea da bidaiaren helburua, ibilbideari buruzko orri honetan kontatzen dudan moduan. Pagomakurren hasi eta 300 bat pasatxo kilometro Linzan amaitzeko.

Bidaia bi txandatan burutu dut.

2022ko urriaren 31an ekin nion lehen txandari. Bederatzi etapa egin genituen bata bestearen atzetik. Baina agenda arazoak zirela eta Orhi magalean utzi behar izan nuen.

Bigarren zatia 2023ko martxoaren 4 eta 5ean egin genuen.

Bidaiaren kontakizuna etapaka egiten joan nintzen.

Dokumentala

Amaierako puntua, dokumentala. Hau izango da proiektuaren azken emaitza. Bidaian zehar Pellok grabaturiko irudiekin eta Maite Arroitajauregi Mursegoren musikarekin osatuko dugu.